Presupostos da Xunta

No DOG de hoxe publícase a Lei de orzamentos xerais de Galicia para o ano 2009. Nela recóllese a suba das retribucións nun 2% e o cumprimento do acordo sobre as pagas extras (1% da masa salarial).

Puntos da promoción interna ao grupo D

Hoxe publícase no DOG a resolución do tribunal pola que se fai pública a baremación da fase de concurso da promoción interna ao grupo D. Os disconformes teñen dez días hábiles para a presentación das alegacións correspondentes.

Romeu e a función pública galega

O conselleiro de Presidencia sae nos medios de comunicación para dar conta dos achádegos que uns supostos "expertos" acaban de facer no tema da función pública. Segundo parece, o ano que ven volverán á carga coa modificación da Lei da Función Pública (esta modificación xa era obrigada cando sacaron a anterior, pero lles corría prisa aprobar, entre outras cousas, o plus para os altos cargos).
Curioso é que os expertos consultados sexan altos cargos do goberno galego, catedráticos das universidades galegas, dirixentes empresariais e representantes da xustiza e da administración local (non din a quen representan, supoñemos que a eles memos), quedan fóra os propios traballadores que, como é sabido, non son "expertos" na cuestión.
E que propoñen estes expertos? Pois propoñen o de sempre: "profesionalización" dos altos cargos (medo da o que quererá dicir esta palabra), incremento das retribucións variables e favorecer aos funcionarios que máis traballen con ascensos (xa temos o dedo caprichoso outra vez en circulación).
E quen fará a avaliación dos funcionarios? Como xa é sabido que os funcionarios non son eficaces, os expertos teñen a solución: crearase unha "axencia" que faga esta labor dun xeito "externalizado". Traducción: crearase un "chiringo" para o amigolo de turno.
Eso si: como o réxime disciplinario do funcionariado é pequeno, aumentarase o "catálogo de actuacións sancionables" da actual lei.
En fin, amigo Romeu. Cada vez mellor.

Persoal laboral

No DOG de hoxe publícanse as ordes polas que se nomea persoal fixo da Xunta de Galiccia a aqueles que superaron os procesos selectivos da categoría 001 (camareiro limpador/axudante cociña/pasador de ferro e outras) e da categoría 011 (limpador/fregador e outras) do grupo V do convenio. Tamén sae a resolución pola que se eleva a definitiva a relación de aspirantes aprobados para o ingreso como persoal laboral de xestión administrativa no CIXTEC.

Noraboa a todos e todas.

Consolidación de emprego

No DOG de hoxe publícanse varias resolucións da Dirección Xeral da Función Pública pola que se elevan a definitivas as relacións de admitidos e excluidos nos procesos de consolidación de emprego dos subgrupos A1, A2, C1, C2 e agrupación profesional de persoal subalterno. Os excluídos poderán reclamar nun prazo de 10 días.

O DOG informa tamén que as listas se poden consultar na páxina da Xunta, picando aquí.

Nomeamento de persoal laboral

No DOG de hoxe publícanse as ordes polas que se nomea persoal laboral da Xunta de Galicia ás persoas que superaron as probas para a categoría 003 do grupo IV (auxiliar de clínica/auxiliar sanitario e outras) e a categoría 002 do grupo V (axudante de traballos e oficios/axudante de albanel e outros).

Noraboa a todos e todas.

Promoción interna ao grupo B

Publícase hoxe tamén no DOG a resolución que fai pública a relación de aspirantes que superaron a promoción interna para o grupo B da Xunta de Galicia. Os interesados poden interpoñer un recurso de alzada no prazo de un mes.

Noraboa.

Fondo de acción social 2007

No DOG de hoxe publícase a resolución pola que se anuncia a concesión das axudas do Fondo de Acción Social para o ano 2007 (sí, do 2007, aínda que estamos rematando o 2008). Os interesados poderán interpoñer un recurso de alzada no prazo de un mes.

Para consultar, pódese picar aquí.